“Mən bu halı Ermənistan hakimiyyətində mövcud olan ziddiyət kimi dəyərləndirirəm və bu baxımdan da Soçi görüşündən məsələnin həlli ilə əlaqədar konkrek bir irəlləyiş gözləmirəm”.
Bunu hafta.az-a Azərbaycan KP MK-nın sədri Rauf Qurbanov Rusiya Prezidenti Vladimir Putinin Soçi görüşü öncədi Qarabağla bağlı bəyanatlarına diqqət çəkərkən bildirib.
R.Qurbanov xatırladıb ki, Rusiya Federasiyasının prezidenti Vladimir Putin “Valday” Diskussiya Klubunun iclasında politoloq Aleksandr İskəndəryanın Qarabağla əlaqədar verdiyi sualı cavablandırarkən bir daha qeyd etdi ki, Qarabağ probleminin dinc yolla həlli məsələsində, Rusiya dövlətinin mövqeyi aydındır.
“Vladimir Putin bidirib ki, sülh müqaviləsi imzalanmalı və eləcə də sərhədlərin delimitasiya və demorkasiya məsələləri həll olunmalıdr.
“Rusiya regionda sülhün və sabitliyin tərəfdarıdır, bu məsələ ilə əlaqədar hansı variantın seçilməsi isə Ermənistan xalqının və rəhbərliyinin daxili işidir”-Putin deyib.
Vladimir Putin məsələyə daha da aydınlıq gətirərək qeyd edib ki, “Biz tərəflərin heç birinə nəyi isə məcbur etmək fikrində deyilik. Ermənistana da diktə edə bilmərik və belə bir niyyətimiz də yoxdur. Əgər erməni xalqı və indiki Ermənistan rəhbərliyi hesab edirsə ki, bu sülh müqaviləsinin hansısa konkret variantını seçmək lazımdır. Məsələn, Vaşinqton variantını, o da Azərbaycanın bütün Qarabağ üzərində suverenliyinin tanınmasını nəzərdə tutur. Əgər Ermənistan belə düşünürsə, biz erməni xalqının bu seçiminə dəstək verəcəyik.”
Rusiya prezidenti çıxışının sonunda qeyd edib ki, “Ermənistan bizim strateji tərəfdaşımız, müttəfiqimizdir və biz, əlbəttə ki, Azərbaycanın maraqlarını nəzərə alaraq, Ermənistanın özünün nə təklif edəcəyinə diqqət yetirəcəyik”.
R.Qurbanov qeyd edib ki, Azərbaycan prezidenti İlham Əliyevdən fərqli olaraq Ermənistan Baş naziri Nikol Paşinyan iqtidarı müstəqil siyasət aparmır. Qərb institutlarının maliyə dəstəyi ilə hakimiyyətə gəlmiş bu şəxs ağalarının tapşırıqlarını icra etməklə məşğuldur. Bu da öz xalqına qarşı xəyanət və erməni ictimaiyyətini qərbin girovuna çevirməkdir.
“Dünən Ermənistan parlamentinin müdafiə və təhlükəsizlik məsələləri üzrə daimi komissiyasının sədri, hakim “Vətəndaş Müqaviləsi” partiyasından olan deputat Andranik Koçaryan bəyan edib ki, onlar sülh sazişində maraqlıdılar, lakin bunun delimitasiya və demarkasiya ilə eyni vaxtda həyata keçirmək mümkün deyil. Halbuki, Koçaryandan bir gün əvvəl Paşinyan qeyd etmişdi ki, bu ilin sonuna qədər delimitasiya işlərini bitirmək olar. Bu məqamda məsələnin görünən tərəfi ondan ibarətdir ki, Azərbaycanla sərhədlərin nizama salınmasında və o cümlədən sülh sazişinin imzalanmasında Ermənistan hakimiyyətində yekdil fikir yoxdur. Məhz bu da yuxarıda qeyd etdiyim kimi Ermənistan iqtidarının müstəqil siyasət aparmadığının məntiqi göstəricisidir”.
